神級嘅教練、神級領隊領隊，具有另一種能力，就係為佢哋嘅學生、佢哋嘅團隊，做旁述員。唔單止係做Storyteller，而係做Narrator。

一個團隊或者係一個人，要到終極嘅level 99，必須要擁有強大、歷練嘅自學、自我應變/調整能力。踢波踢到最後15分鐘，突然俾人連入兩球，教練可以換戰術、調動人員，嘗試改變戰況。更理想嘅係團隊自己淡定應變，自我調整，突破困境。而要鍛鍊自我學習能力，就必須先有自我觀察嘅能力。

當局者迷

但實際上，當一個人或者一個團隊經歷緊一啲事情、打緊場波、做緊一個project、開緊一個會議、溝緊條仔、經歷緊人生大改變嘅時候，都未必有能力同埋時間，去好客觀咁觀察同理解件事。當一個人連續100個鐘頭集中晒佢所有嘅精力，去program個新porn app嘅haptic feedback mechanism，之後公司求VC攞funding敗北，佢未必可以理解，公司攞唔攞到funding，同佢點樣設計個app嘅震動力度究竟有冇任何關係。

又或者你管嘅幾間分店嘅店舖經理，日復日咁埋頭苦幹，慢慢將佢哋舖頭嘅服務水平改善。但係佢哋未必可以喺開weekly meetings時，清楚回顧每一步改變嘅細節。

所以除咗宏觀觀察嘅能力，缺乏時間同埋角度去客觀地宏觀地睇事情，亦係一個問題。游緊水嘅時候，又要望住池底嗰條線，又要記得四下手就要抬頭吸氣，邊有可能睇倒自己條腰彈得似唔似一隻蝦啊。

冇適當嘅空間同角度去觀察一件事，譬如以為個app震多啲就可能會有更多funding，或者以為customer service好咗係因為你日日扮熊貓鼓勵士氣，睇嘅野唔全面，誤判事情因果，都會直接影響影響一個人、團隊嘅自我學習嘅能力同效率。

所以一個旁述員，最有價值嘅地方，就係準確咁描述事情嘅來龍去脈，幫助其他人更加全面地理解件事。

睇片自戀

就好似有啲人，為咗改善自己嘅演講能力，會錄低自己，然後睇返自己（唔係自戀嗰種）。NBA球隊亦有類似嘅習慣。佢地除咗練波同舉野，另外一個練習/準備項目，就係watch tapes（睇帶）。一個NBA團隊，其實係有一隊人專門負責整比賽片段比啲教練同埋球員睇。佢哋會睇對手嘅video，當然亦會花好多時間，睇自己嘅片，分析自己嘅表現。所以，當我地冇專人幫我地剪片製作人生highlights、冇咁嘅時間（同埋未咁變態）可以錄晒同睇番晒所有嘅會議、對話等，一個好嘅旁述，就變得更加重要。所以一個領袖，一個老闆，應該著力去為團隊做旁述，做人肉錄影機，一齊回帶睇片。

有一個Leader講過，「The role of a leader is to define reality and give hope.」。所以旁述，就係去define reality嘅其中一種方法。旁述，亦可以give hope，鼓勵眾生。伍晃榮講波，就係唔同啲、有feel啲，聽完佢嘅報導，心裡總係會多咗個分莫名嘅衝動同埋妄想，覺得自己都可以射番球世界波。BBC Planet Earth嘅narrator David Attenborough嘅勁，唔單止係可以搞到你更明白點解一隻雀要等三日先張毛鬆翼叫春。佢勁，係因為佢可以搞到你，因為得到點解一隻雀要等三日先張毛鬆翼叫春嘅知識，而覺得人生更有意義，更enlightened。