中港台的爆

Source: https://www.youtube.com/watch?v=GvllLpNfKfc

過往一年,公司調咗我去新嘅職位。我依家嘅工作將我帶到港澳台。我份工係前線服務性行業,日日面對客人。所以經常俾人屌。經過一年比兩岸三地嘅人插,略有心得。

現實所致,我地面對最多嘅係大陸遊客。不過首先說明,皆因佢地嘅總量實在太大(80%人流=大陸遊客),一滴仔精油就有海量咁多。但比例上,屌人嘅大陸客其實最少。

大陸客 : 長征

其實大陸客人基本上都好易相處。佢地比較容易處理。唔知點解,其中一個方法係先下手為強,兇啲、惡啲、直接啲。可能對佢地黎講,咁樣更加清楚,同埋可能對佢地黎講“客氣”“customer service”可能冇乜價值。可能同鄉個種態度「喂!你啊!這裏付錢啊!!這裏!👇🏼!」更為親切。

咁當然,大陸人都有爆嘅時候。通常佢哋一爆,10次著咗8次佢地都會先下軟工,同你講一大堆讓你同情嘅理由。佢地亦都特別喜歡圍毆,成團嘅人一齊圍你,成條村一齊圍你(記得,哩個絕對可能係我主觀感覺 — “一滴仔精油就有海量咁多”)。佢地特別長氣,特別鍾意理論,而且時間對佢地黎講,完全唔值錢(同Customer Service有得揮)。

試過好幾次,佢地由下晝4點理論到凌晨4點。有一個呦通宵,中間我地一齊叫外賣。要大陸人落台。你可以話好難,亦可以話好易。其實只要搵到方法令佢地感覺你係同鄉,通常都ok。不過我嘅經驗話俾我聽,皆因大陸有53個民族,要成為同鄉,宵夜真係走唔甩。

台灣客: 0–120

近距離接觸台灣客人,絕對係一個新體驗。

相信好多人都會覺得台灣人超友善、又客氣、又禮貌。我都有同感。99%嘅客人都非常文明有禮。不過如果台灣人要爆,感覺就好似大傷風打乞嚏,半秒內由0直接到120%。

有一次,客人件產品有問題。當我地同佢解釋我地冇辦法處理,佢聽著聽著,一切好平靜:

「不好意思,麻煩你。」

佢慢慢伸出手,示意要翻佢個產品。

說時遲那時快,產品一到佢手,佢猛力將件產品飛落地。唔係普通咁飛,係好似喺足球禁區邊掉界外球咁掉,雙手向腦後cock,身體呈S字型,手core腿同時發力,半秒內從0到120%。

可能產品質量幾好,只係爛咗少少。佢執起產品,再掉。如是者掉咗五次。之後,掉頭就走咗。

我當時嚇到身體好多地方都感覺細咗。但係身邊嘅台灣同事,好冷靜,慢慢處理碎片。我稍為冷靜咗少少,想慰問下佢。同事好禮貌咁同我講,「很感謝你關心啊 ~~謝謝你~~~」

我覺得台灣人好多都抑壓得好緊要。同時台灣人承傳咗日本人嗰種mindfulness,特別注意自己行為對別人嘅影響,所以大部份時候都好禮貌,好抑壓。但係一爆,就好似將所有爆嗰刻之前所有嘅負能量一次過爆晒出黎。就好似我個5個月嘅仔一樣,三日唔痾,一痾就爆到一背都係。

港人:報警

相對黎講,香港人投訴最多。而且雞毛蒜皮嘅事情亦較多。不過香港人好少大爆,好少會好似台灣人咁癲爆,亦(絕對)唔會好似大陸人咁搞幾個鐘。

不過香港人特別喜歡搵manager,大聲,拍video,報警,同埋拍video。

總體黎講,就係香港爆嘅客,好似好需要「公道」、面子同怕洩底:拍video話放上網兇你會公諸於世等公審;大聲叫等其他人拍video等公審;乜Q都call警察。總之感覺就係要。。。博人地同情、搵裁判、比公道。

有一點我好唔明。其實路人甲永遠都唔會加入,唔會比意見,多一事不如少一事。所以一方面香港人希望大家比個公道,一方面永遠都唔會參戰。搞唔明。

香港人亦好珍惜時間,差不多永遠都唔會打長久戰。香港人亦都好喜歡甜頭,要著數,死都要“la”翻渣沙,執輸行頭,慘過敗家。唔係就報警。著數文化好unique,搏一搏,單車變摩托。

試過有一次,客人死到要賠償。警察嘗試擺平(佢地永遠都唔會做裁判),最後客人要求我地送3個膠袋。點解3個?因為一個佢話唔夠,5個我冇面(註:我係香港人)。

至於外國人呢。。。

Leave a Comment